ចិន-ហុងកុង៖ នៅថ្ងៃសៅរ៍ ទី១៦ ខែមីនានេះ តុលាការហុងកុងបានប្រកាសកាត់ទោសមនុស្សចំនួន ១២នាក់ឱ្យជាប់ពន្ធនាគារម្នាក់ៗពី ៤ឆ្នាំដល់ ៧ឆ្នាំនៅក្នុងសំណុំរឿងកុបកម្មដ៏កក្រើកមួយដែលបានប៉ះពាល់ដល់អគារសភារបស់ទីក្រុងហុងកុង នាអំឡុងបាតុកម្មប្រឆាំងរដ្ឋាភិបាលកាលពីឆ្នាំ២០១៩។ 

សូមរំឮកឡើងវិញថា កាលពីថ្ងៃទី០១ ខែកក្កដា ឆ្នាំ២០១៩ ក្រុមអ្នកតវ៉ាបាននាំគ្នាសម្រុកចូលទៅកាន់អគារនៃស្ថាប័ននីតិប្បញ្ញត្តិរបស់ហុងកុង ដោយបានវាយកម្ទេច និងប៉ះពាល់ដល់សម្ភារៈមួយចំនួននៅខាងក្នុងអគារ ខណៈដែលប្រជាជនហុងកុងបាននាំគ្នាខឹងសម្បារ និងផ្ទុះកំហឹងយ៉ាងខ្លាំងចំពោះស្ថាប័នសភាចំពោះច្បាប់បត្យាប័ន ដែលបើកផ្លូវឱ្យរដ្ឋាភិបាលចិនអាចនាំយកអ្នកទោសទៅកាត់ក្ដីនៅទឹកដីរបស់ខ្លួនបាន។ 

ក្នុងការកាត់ទោសរបស់តុលាការនេះ គេសង្កេតឃើញសកម្មជននយោបាយចំនួនពីររូបរួមមាន លោក Ventus Lau ត្រូវបានផ្តន្ទាទោសឱ្យជាប់ពន្ធនាគារ ៥៤ខែនិង ២០ថ្ងៃ ខណៈលោក Owen Chow ត្រូវកាត់ទោសឱ្យជាប់ពន្ធនាគារ  ៦១ខែ និង១៥ថ្ងៃ។ ចៅក្រមដែលជាអ្នកសម្រេចសេចក្ដីបានពណ៌នាឧបទ្ទវហេតុនេះថាជាការវាយប្រហារយ៉ាងធ្ងន់ធ្ងរដល់នីតិរដ្ឋរបស់ហុងកុង។ ចៅក្រមក៏បានបញ្ជាក់ដែរថា ក្រុមបាតុករ​​បាននាំគ្នាកម្ទេចរបាំងដែក និងសម្រុកចូលទៅក្នុងអគារសភាដោយគប់ស៊ុតនៅពាសពេញបរិវេណអគារ ព្រមទាំងការបាញ់ថ្នាំពណ៌ជាពាក្យស្លោកនយោបាយលើជញ្ជាំងអគារ និងថែមទាំងបានជះថ្នាំពណ៌នៅលើនិមិត្តសញ្ញានៃរដ្ឋាភិបាលបន្ថែមទៀត។ 

គួរបញ្ជាក់ថា ហេតុការណ៍បាតុកម្មដ៏កក្រើកកាលពីឆ្នាំ២០១៩ បានបង្កឱ្យមានការឃាត់ខ្លួនមនុស្សប្រមាណ ១០,២០០នាក់ ដែលក្នុងនោះមានមនុស្សចំនួន ២,៩៣៧នាក់ត្រូវបានចោទប្រកាន់ពីបទឧក្រិដ្ឋនានាដូចជា បទកុបកម្ម ការប្រមូលផ្តុំគ្នាដោយខុសច្បាប់ និងការបង្កឱ្យមានការខូចខាតខាងព្រហ្មទណ្ឌជាដើម​​។ ក្នុងនោះផងដែរ បើតាមប្រភពពីសារព័ត៌មានអនឡាញមួយដែលមានជំនាញខាងព័ត៌មានផ្លូវច្បាប់បានបញ្ជាក់ថា មនុស្សចំនួន ៨៧០នាក់ ត្រូវបានតុលាការហុងកុងចោទប្រកាន់ពាក់ព័ន្ធនឹងករណីកុបកម្ម៕